Tamén intervirá na cita Jeff Moses, coordinador de apoio ao desenvolvemento das competencias en centros educativos e do novo bacharelato WBQ en Gales. Traballa directamente con centros para desenvolver metodoloxías de competencias básicas. O convidado galés presentará en Ferrol o programa “Getting Started”, un kit de estratexias para introducir o traballo por tarefas nas programacións das aulas. O curso terá lugar os días 21, 22 e 23 de maio e 11 e 12 de xuño, finalizando o prazo de inscrición o vindeiro 15 de maio. A actividade, que como é habitual terá lugar en horario de tarde, está dirixida ao profesorado de todos os niveis e áreas educativas, segundo informou o CFR.

Metodoloxía > O traballo por competencias é unha nova forma de entender a docencia, “é a forma en que as persoas conseguen mobilizar todos os seus recursos persoais -cognitivos, afectivos, sociais, etc.- para acadar o éxito na resolución dunha tarefa nun contexto definido”, apuntan dende o centro de formación do profesorado ferrolán.

As oito competencias básicas que o alumno ten que adquirir ao longo da súa formación para ser capaz de desenvolverse ante os problemas da vida cotiá son a matemática, comunicación lingüística, coñecemento e interacción co mundo físico, información e competencia dixital, social e cidadá, competencia cultural e artística, para aprender a aprender e autonomía e iniciativa persoal.